کۆمسیۆنی باڵای هەڵبژاردنەکانی عێراق رایدەگەیەنێت، هەر کاندیدێک هەوڵی سەرپێچی بدات لەڕێی کڕین و فرۆشتنی کارتی دەنگدان، لە هەڵبژاردن دووردەخرێتەوە.
کۆمسیۆنی باڵای سەربەخۆی هەڵبژاردنەکانی عێراق لە بەیاننامەیەکدا دەڵێت، بۆ پرۆسەی هەڵبژاردنی داهاتووی ئەنجومەنی نوێنەرانی عێراق، کۆمسیۆن رێگریدەکات لە هەر پێشێلکارییەک کە مەترسی لەسەر شەفافیی پرۆسەکە دروستبکات.
ئاماژەی بەوەشکرد، “هەموو لایەک ئاگاداردەکەینەوە کە پرۆسەی کڕین یان فرۆشتنی کارتی دەنگدەر و بەکارهێنانی سەرچاوەکانی دەوڵەت بۆ مەبەستی هەڵبژاردن، یەکێکە لە تاوانەکان کە سەرپێچیکار (دەنگدەر بێت، کاندید بێت، هاوپەیمانی بێت، یان لایەنێکی سیاسی) سزادەدرێت”.
راشیگەیاند، جگە لەو رێوشوێنە یاساییانەی کە لە دژی دەگیرێنەبەر، کۆمسیۆن رێکاری دیکە بەرامبەر لایەنی سەرپێچیکار دەگرێتەبەر، بەمشێوەیە:
– ئەگەر لایەنی سەرپێچیکار کاندید بوو، لە هەڵبژاردن دووردەخرێتەوە.
– ئەگەر لایەنی سەرپێچیکار هاوپەیمانی یان لایەنی سیاسی بوو، بڕوانامەکەی هەڵدەوەشێندرێتەوە.
