پەیامنێری تۆڕی میدیایی ئێستا لە شاری هەولێر گواستییەوە، وەفدێكی باڵای عێراق لە هەرێمی كوردستانە و بڕیارە ئەمڕۆ لەگەڵ حكومەتی هەرێم كۆببێتەوە بۆ تاوتوێكردنی دەستپێكردنەوەی هەناردەی نەوتی هەرێم و ئەگەر لەسەر ئەو پرسە بگەنە رێككەوتن كێشەی مووچەش چارەسەردەبێت.
هەر لە زانیارییەكاندا هاتووە، وەفدێكی باڵای وەزارەتی نەوتی عێراق كە پێكهاتوون لە راوێژكار و بەڕێوەبەری گشتیی كۆمپانیای سۆمۆ و وەفدێكی تەكنیكی، لە هەولێرە و بڕیارە ئەمڕۆ لەگەڵ حكومەتی هەرێمی كوردستان بە تایبەتیش لەگەڵ وەزارەتی سامانە سروشتییەكان كۆببێتەوە.
ئاماژەی بۆ ئەوەش كرد، كۆبوونەوەی وەفدەكە لەگەڵ هەرێم بۆ تاوتوێكردنی دەستپێكردنەوەی هەناردەكردنی نەوتی هەرێمی كوردستانە و لەلایەن محەمەد شیاع سودانی سەرۆك وەزیرانی عێراقەوە دەسەڵاتی رێككەوتن بە وەفدەكە دراوە.
وتیشی،”ئەگەر رێككەوتن بكرێت كێشەی مووچە و بودجەی هەرێمی كوردستان بەرەو چارەسەر دەچێت و پێشتریش حكومەتی هەرێم ئامادەیی دەربڕیبوو بۆ دەستپێكردنەوەی هەناردەكردنەوەی نەوتی هەرێمی كوردستان”.
