قائیمقامیەتى سلێمانى رایدەگەیەنێت، بۆ رووبەڕووبوونەوەى وشکەساڵى و دابینکردنى ئاو چەند رێوشوێنێک دەگیرێنەبەر.
ئاوات محەمەد، قائیمقامی سلێمانی رایگەیاند رووبەڕووی دۆخێکی نەخوازراو بووینەتەوە کە وشکەساڵییە، هەموو هەوڵی خۆمان بەکاردەهێنین بۆ ئەوەى لە وەرزی هاویندا ئاوی پاک بۆ خواردنەوە و ئاودانی باخ و سەوزاییەکانیش دابینبکەین، لەگەڵ ئەوەشدا رێگەبگرین لە بڵاوبوونەوەی پەتای سکچون و رشانەوە و ڤایرۆسی کۆلێرا.
وتیشی، “هەماهەنگی نێوان فەرمانگەکان زیاتر دەکەین بۆ گرنگیدان بە شەمعەکانی ئاو و جیاکردنەوەی ئەوانەی بۆ خواردنەوە گونجاون”.
ئەو وتانەى قائیمقامى سلێمانى ئەمڕۆ لەمیانەى کۆبوونەوەکدا بوو تایبەت بە چۆنیەتیی خۆگونجاندن و رووبەڕووبوونەوەی وشکەساڵی لە وەرزی هاویندا بە ئامادەبوونى بەڕێوەبەر و لێپرسراوی فەرمانگە پەیوەندیدارەکان.
بەپێى راگەیەندراوێکى قائیمقامیەتى سلێمانى لە کۆبوونەوەکەدا چەند پێشنیارێک گەڵاڵەکران:
– دروستکردنی لیژنەیەکی باڵا بۆ رووبەڕووبوونەوەی وشکەساڵی.
– دانانی بودجەیەک تایبەت بە وشکەساڵی لەلایەن ئەنجومەنی وەزیران.
– هەموو ئەو بیرانە لە دەوروپشتی سلێمانی هەن و ئاوەکانیان بەکەڵکی خواردنەوە دێن چاکبکرێنەوە و هەتا کۆتایی وەرزی هاوین ئیدارە بدرێن بۆ ئەوەی هاوڵاتیان پەنا نەبەنە بەر ئاوی نەشیاو.
– لەڕێگەی شەمعەکانەوە ئاو بۆ سەوزایی و باخچە و پارکەکان دابینبکرێت.
– چاودێری هەموو ئەو تانکەرانە بکرێت کە ئاو دەفرۆشن بە هاوڵاتیان.
