سەرۆک کۆمارى ئێران رایدەگەیەنێت، هەوڵیان بۆ جەنگ نەداوە و دەستپێشخەریش نەبوون و دەشڵێت، نایانەوێت چەکى ئەتۆمییان هەبێت.
مەسعود پزیشکیان، سەرۆک کۆمارى ئێران رایگەیاند، لە کوشتن و تیرۆر ناترسن و ئەوان نیین کە هەوڵیان بۆ جەنگ نەداوە و ئەوانیش دەستیان پێنەکرد.
سەبارەت بە تۆمەتبارکردنى ئێرانیش بۆ هەوڵى بەدەستهێنانى چەکى ئەتۆم وتى، “هیچ نیازێکمان نییە بۆ پەرەپێدانى چەکى ئەتۆمى” لەگەڵ ئەوەشدا دووپاتیکردەوە کە دەیانەوێت سوود لە وزەى ئەتۆم وەربگرن و “کەس ئەم مافەمان لێزەوت ناکات”.
پزیشکیان لە هێرشەکانى ئیسرائیل بۆسەر وڵاتەکەى ئەمریکاى تۆمەتبارکرد و باسى لەوەکرد، ئەمریکا بۆ هێرشەکان رێگە بە ئیسرائیل دەدات.
دەربارەى دانوستانەکانى ئەم ماوەیەش سەرۆکى ئێران ئەوەى خستەڕوو، “ئێمە نەبووین کە وازمان لە دانوستانەکان هێنا”.
لە بەرەبەیانى هەینیی رابردووەوە شەڕ و رووبەڕووبوونەوەکانى نێوان ئیسرائیل و ئێران دەستیان پێکردووە.
