سەرۆک کۆماری عێراق پێشوازیی لە سەرۆکی دادگای باڵای فیدراڵی کرد و لە کۆبوونەوەی نێوانیاندا، باسی مووچەی فەرمانبەرانی هەرێم کرا.
لە راگەیەندراوێکی سەرۆکایەتیی کۆماری عێراقدا هاتووە، “لە میانی کۆبوونەوەکەدا، باس لە رێگاکانی پاراستنی هەماهەنگی و هاوکاریی نێوان سەرۆکایەتیی کۆمار و دادگای فیدراڵی کرا، بۆ بەدیهێنانی یەکگرتوویی”.
سەرۆک کۆمار جەختی لە بەهێزکردنی سەروەریی یاسا و سەربەخۆیی دەسەڵاتی دادوەری کردەوە، بەوپێیەی زامنی چارەسەرکردنی هەموو ناکۆکییەکانە.
سەرۆک کۆمار لە کۆبوونەوەکەدا رایگەیاند، دۆزینەوەی چارەسەری کۆتایی بۆ خەرجکردنی پارەی مووچەی فەرمانبەرانی هەرێم و چارەسەرکردنی ئەم پرسە بەپێی دەستوور و یاسا و بڕیارەکانی دادگای فیدراڵی، گرنگە و تیشکی خستەسەر پابەندبوونی سەرۆکایەتیی کۆمار، بە جێبەجێکردنی دەستوور و پابەندبوون بە بڕگەکانی و پاڵپشتیکردنی دەسەڵاتی دادوەری.
بەپێی راگەیەندراوەکە، لای خۆیەوە جاسم محەمەد عەبود، سەرۆکی دادگای فیدراڵی ئاماژەی بەوەکرد، ئەرکەکانی دادگاکە بەپێی دەستوور و یاسا جێبەجێدەکرێت، بەمەبەستی دەستەبەرکردنی بەرژەوەندی و مافەکانی خەڵک و پتەوکردنی یەکڕیزیی نەتەوەیی.
هاوکات، جەختیشی لە چارەسەرکردنی قەیرانی مووچەی فەرمانبەرانی هەرێم بەپێی یاسا کردەوە.
