بەهۆی ئاگرەكەی شاخی دەلوجەوە لە قەرەداغ نزیكەی 200 بۆ 250 دۆنم لەپووش و پاوان و دارستانی سروشتی سووتاون و قائیمقیامی قەزای قەرەداغیش دەڵێت، لێكۆڵینەوە لە هۆكاری ئاگركەوتنەوەكە بەردەوامە و تاوەكو ئێستا هیچ كەسێك لەسەر ئەو رووداوە دەستگیرنەكراوە”.
شیرین مەحمود، قائیمقامی قەزای قەرەداغ، بە میدیای رەسمیی یەكێتی راگەیاند، “بەهۆی ئاگرەكەی شاخی دەلوجەوە نزیكەی 200 بۆ 250 دۆنم لە پووش و پاوان و دارستانی سروشتی سووتاون، جگە لە سووتانی ژمارەیەكی زۆر لە ئاژەڵی كێوی، بەڵام خۆشبەختانە زەوی و باخی جووتیارانی سنوورەكە زیانیان پێنەگەیشتووە”.
وتیشی، “ئەو ناوچەیەی ئاگرەكەی لێكەوتووەتەوە نزیك ئەستێڵە و شوێنێكی گەشتیارییە و ژمارەیەكی زۆر گەشتیار روویان تێكردووە، بۆیە لێكۆڵینەوە لەچۆنێتی رووداوەكە بەردەوامە و تاوەكو ئێستاش هیچ كەسێك لەسەر ئەو رووداوە دەستگیر نەكراوە”.
راشیگەیاند، “هەرچەندە ئاگرەكە كۆنترۆڵكرا، بەڵام ئەمڕ‌ۆ جارێكی دیكە سەریهەڵدایەوە و لەئێستادا تیمەكانی بەرگریی شارستانی و پۆلیس و تیمە فریاگوزارییەكان سەرقاڵی دووبارە كۆنتڕۆڵكردنەوەین”.
