لە ئێوارەی ئەمڕۆوە شەش شاخەوان لە چیای سورێن گیریان خواردووە و تا ئێستا رزگار نەکراون.
پەیامنێری تۆڕی میدیایی ئێستا گواستییەوە، شەش شاخەوان کە بەمەبەستی شاخەوانی روویان لە چیای سورێن کردووە بەهۆی درەنگکەوتن و هاتنی شەو بەسەریاندا لەسەر چیاکە گیریان خواردووە.
ئاماژەی بەوەشکرد، دووان لە شاخەوانەکان ئازاری قاچیان هەیە، بۆیە ئەمشەو دەمێننەوە و داوا دەکەن تا سبەی لایەنە پەیوەندیدارەکان بێن بە هانایانەوە و رزگاریان بکەن.
لای خۆیەوە سەیوان حەمەساڵح بەڕێوەبەری پۆلیسی دارستان و ژینگەی خورماڵ بە تۆڕی میدیایی ئێستای راگەیاند،لە رێگای تۆڕی میدیایی ئێستاوە لە هەواڵی گیرخواردنی ژمارەیەک شاخەوان لە چیای سورێن ئاگادارکراینەوە، لەگەڵ بەڕێوەبەری ناحیەی خورماڵ هەماهەنگیمان کردووە، تیمێکمان پێکهێناوە و بەرەو چیاکە بەڕێكەوتوون، بەڵام نەیانتوانیوە هیچ سەرەداوێکیان دەستبکەوێت، بۆیە لە ئێستادا لە گەڕان وەستاون، سبەینێ بەیانی هەوڵدەدرێت لە رێگای هێلیکۆپتەرەوە رزگاربکرێن..
