بڕیارە ئەمڕۆ ئەنجومەنی وەزیرانی هەرێم کۆببێتەوە و پرسی گرێبەستەکانی وزە لەگەڵ کۆمپانیا ئەمریکییەکان تاوتوێبکات.
لە چەند رۆژی رابردوودا، مەسرور بارزانی، سەرۆکی ئەنجومەنی وەزیرانی هەرێم، سەرپەرشتیی واژووکردنی دوو رێککەوتنی وزەی بە بەهای زیاتر لە 110 ملیار دۆلار کرد لەگەڵ چەند کۆمپانیایەکی ئەمریکی.
دواتر وەزارەتی نەوتی عێراق ئەو جۆرە مامەڵەیەی بە نادەستووری و پێشێلکردنی یاسا بەرکارەکان ناوبرد.
رۆژی دووشەممەی رابردوو، ئاژانسی رۆیتەرز لە زاری چەند سەرچاوەیەکەوە بڵاویکردەوە، وەزارەتی نەوتی عێراق سکاڵای لەسەر حکومەتی هەرێم تۆمارکردووە و ئەو گرێبەستانەی لەگەڵ کۆمپانیا ئەمریکییەکان کراون، دەبنە بەربەستێکی دیکەی بەردەم دەستپێکردنەوەی هەناردەی نەوتی هەرێم.
