وەزارەتی دارایی رایگەیاند، “بۆ مووچەی مانگی ئایار پێنج هەزار و 261 خانەنشینی نوێ مووچە وەردەگرن”.
وەزارەتی دارایی و ئابوریی هەرێم لە راگەیەندراوێکدا بڵاویکردەوە، لە چوارچێوەی هەوڵەکانی وەزارەتی دارایی و ئابوری و لەسەر راسپاردەی وەزیری دارایی چەندین رێکار و هەنگاوی پێویست بۆ خێرا راییکردنی مامەڵەی خانەنشینان گیراونەتەبەر، لە چوارچێوەی ئەوەشدا داوا لەسەرجەم وەزارەت و فەرمانگەکانی نەبەستراو بە وەزارەت کراوە کە لەسەر بنەمای فۆڕمی زانیاریی بەڕێوەبەرایەتیی گشتیی خانەنشین دۆسیەی ئەو فەرمانبەرانە رەوانە بکەن کە تەمەنی یاساییان لە خزمەت تەواوبووە و بەپێی یاسای خانەنشینی یەکگرتوی عێراق رەوانەی خانەنشینی دەکرێن.
باس لەوەشدەکات، لە ئەنجامی ئەو رێکارانەی لە دوو مانگی رابردوو گیرانەبەر توانراوە بۆ لیستی مووچەی مانگی ئایار پێنج هەزار و 261 خانەنشینی نوێ داخڵی لیستی مووچە بکرێنەوە و ناوەکانیان رەوانەی وەزارەتی دارایی حکومەتی فیدراڵ کراوە تا لەگەڵ مووچەی مانگی ئایار مووچەی مانگەکانی رابردووشیان بۆ خەرج بکرێتەوە بە پێی ئەو تەرخانەی لە ساڵی 2025 بۆیان جێگیرکراوە.
