سەرۆکی لقی هەولێری کۆمسیۆن رایدەگەیەنێت، پرۆسەی تۆمارکردنی ناوی لیستی کاندیدەکان بۆ هەڵبژاردنی عێراق دەستیپێکرد.
مەروان محەمەد، سەرۆکی لقی هەولێری کۆمسیۆن رایگەیاند، ماوەی پێشکەشکردن لە ئەمڕۆ 25ـی ئایارەوە دەستپێدەکات و تا 24ـی حوزەیران بەردەوامدەبێت و ئەمجارەش پێشکەشکردنی لیستەکان لە رێگەی بەرنامەیەکی ئەلیکترۆنیی پەسەندکراوەوە دەبێت.
وتیشی، لە مەرجە بنەڕەتییەکانی خۆکاندیدکردن ئەوەیە، پێویستە داواکار خاوەنی رەگەزنامەی عێراقی بێت و لە رۆژی داواکاریدا، تەمەنی 30 ساڵیی تەواوکردبێت و بە لایەنی کەمەوە، هەڵگری بڕوانامەی بەکالۆریۆس یان هاوتای بەکالۆریۆس بێت.
ئاماژەی بەوەشکرد، “مەرج نییە ئەو کاندیدە خەڵکی ئەو بازنەیە بێت کە خۆی تێدا کاندید دەکات، بەڵام نابێت لە ریزی هێزە چەکدارەکان و دەزگا ئەمنییەکانیش بێت”.
بە بڕیاری ئەنجومەنی وەزیرانی عێراق، رۆژی 2025/11/11 هەڵبژاردنی ئەنجومەنی نوێنەرانی عێراق بەڕێوەدەچێت.
