میكانیزمی دادگاییكردنی رۆژنامەنووسان دیاریكرا

لقی سلێمانی سەندیكای رۆژنامەنووسانی كوردستان رایگەیاند، میكانیزمی سكاڵا و دادگاییكردنی رۆژنامەنووسان دیاریكرا.

بەپێی راگەیەندراوێکی لقی سلێمانی سەندیكای رۆژنامەنووسانی كوردستان، دادگای تێهەڵچوونەوەی سلێمانی سەبارەت بە جێبەجێکردنی بڕیاری ژمارە 2722 لە رۆژی 13/3/2025 ئاماژەی بەوەکرد، پێویستە ئەو كەیسانەی میدیایین، لەو بابەتانەی بەناوی میدیاوە دەكرێن جیابکرێنەوە.

جەختیشی لەوەکردەوە، لە رۆژی دەرچوونییەوە ئەو بڕیارە لە دادگاكانی سلێمانی كاری پێدەکرێت و لەوبارەیەشەوە، عومەر ئەحمەد، سەرۆکی دادگای تێهەڵچوونەوەی سلێمانی، لەگەڵ کاروان ئەنوەر، سکرتێری لقی سلێمانی سەندیکای رۆژنامەنووسان، باسی لە میكانیزمی بانگهێشتكردنی میدیاكاران کرد بۆ بەردەم دادگا بەپێی بڕگە و ماددەكانی یاسای رۆژنامەوانی.

لە بڕیاری ژمارە 2722 لە رۆژی 13/3/2025ـی دادگای تێهەڵچوونەوەی سلێمانیدا هاتووە، دادگای لێکۆڵینەوەی سلێمانی/ 1 تایبەتمەند دەبێت بە بینینی ئەو سکاڵایانەی پەیوەندیدارن بە رۆژنامەنووسان لەناو شاری سلێمانی و، یاسای ژمارە 35ـی ساڵی 2007ـی یاسای رۆژنامەگەری لە کوردستاندا، بەسەریدا پیادەدەبێت.