لویس سوارێز، هێرشبەری ئەزموونداری یانەی ئەتلەتیکۆ مەدرید هێندەی نەخایاند توانی بە باشترین شێوە جێگەی خۆی لە پێکهاتەی دیێگۆ سیمیۆنیدا بکاتەوە.
لەم وەرزەدا “پێستۆلێرۆ” ئاستێکی ناوازەی پێشکەشکردووە، لە کۆتا ڕوبەڕوبوونەوە بەرانبەر ڤالێنسیا گۆڵێکی دیکەی تۆمارکرد و ژمارەی گۆڵەکانی گەیاندە (12 گۆڵ)، لە ئێستادا هاوشانی یوس ئەل نسەیری هێرشبەری ئیشبیلیە بە 12 گۆڵەوە لە لوتکەی ڕیزبەندی گۆڵکارانی لالیگادایە.
هەر گۆڵێک کە هێرشبەرەکە تۆماریدەکات، خەنجەرێکە دەکرێت بە دڵی هاندەرانی یانەی بەرشلۆنە و هەڵە و خراپ خوێندنەوەی ڕۆناڵد کومان و ئیدارەی پێشووی یانە کەتەلۆنیەکە دەردەخات، کە هۆکاربوون بۆ ڕۆیشتن و یاریکردنی بۆ ئاتلەتیکۆ دی مەدرید.
بەراوردی نێوان سوارێز و برەویزوایت
ژمارەکانی سوارێز لەم وەرزەدا ناوازەبوون، لالیگایان تەقاندووەتەوە، توانیویەتی 12 گۆڵ تۆماربکات و ببێتە گۆڵکاری لالیگا، لە بەرانبەردا برەیزوایت تەنها دوو گۆڵی تۆمارکردووە، لە کاتێکدا ئەم هێرشبەرە وەک شوێنگرەوەی لویزیتۆ مامەڵەی لەگەڵدا دەکرێت.
Another incredible performance from Luis Suarez, Joao Felix and Atletico Madrid 🔴🔵
Is La Liga theirs to lose? 🤔pic.twitter.com/CqYNOgbZ31
— Dee😎 (@sadiq7070) January 25, 2021
هێرشبەرە سیلیستیەکە لە هەر 92 خولەکێکدا گۆڵێک تۆماردەکات و بۆ تۆمارکردنی تاکە گۆڵێک پێویستی بە ئاڕاستەکردنی نێوەندی ڕێژەی 1.5 شوتە، لە بەرانبەردا برەویزوایت لەهەر 428 خولەکێکدا گۆڵێک تۆماردەکات و بۆ تۆمارکردنی تاکە گۆڵێک پێویستی بە ئاڕاستەکردنی نێوەندی ڕێژەی 3.5 شووتە.
جگە لە ژمارەکان، لەناو چوارچێوەی سەوزدا کاریزمای سوارێز دە هێندە لە برەیزوایت بەهێزترە، لەم وەرزەدا دیێگۆ سیمیۆنی سوودی لە ترسی بەرگریکاران لە هێرشبەرەکە وەرگرتووە و توانیویەتی بەهێزترین هێڵە بەرگرییەکانی لالیگا و ئەوروپا تووشی شڵەژان بکات.
ڕۆژنامە ناودارەکەی مەدرید بەم هۆیەوە سوارێزی وەک یەکێک لە فاکتەرەکانی سەرکەوتن ئەژمارکردووە لە گرتنەوەی لوتکەی خولی پلە یەکی ئیسپانیا.
