جێگرى سەرۆک وەزیران رایدەگەیەنێت، دەبێت ئازادیی راگەیاندن و رادەربڕین بکەینە هێڵی سووری کۆمەڵگاکەمان بۆ ئەوەى هیچ هێز و لایەنێک دەست بۆ بەرتەسککردنەوەی سنووری ئازادیی راگەیاندن و رادەربڕین نەبات.
قوباد تاڵەبانى، جێگرى سەرۆک وەزیرانى هەرێم لە پەیامێکدا رایگەیاند، دەبێت ئازادیی راگەیاندن و رادەربڕین بکەینە هێڵی سووری کۆمەڵگاکەمان. بێزار و ماندوونەبین لە هەر بۆنەیەکدا باسی بکەین و جەختی لێ بکەینەوە تا لە مێشك و دڵ و دەروونی تاک بە تاکی ئەندامانی کۆمەڵگاکەماندا وەک نەریتێکی بەهێزی کۆمەڵایەتی دەچەسپێت، بۆ ئەوەی هیچ هێز و کەس و لایەنێک رۆژێک لە رۆژان جورئەتی نەبێت دەست بۆ بەرتەسککردنەوەی سنووری ئازادیی راگەیاندن و رادەربڕین ببات.
دەشڵێت، لە رۆژی جیهانیی ئازادیی رادەربڕیندا یادی پارێزەرانی حەقیقەت، ئەو رۆژنامەنووس و نووسەرە ئازایانە بەرز رادەگرین کە لە پێناو گەیاندنی حەقیقەتدا گیانیان بەخت کرد و هیوادارین چیتر ناوی هیچ رۆژنامەنووسێک بە مۆنیۆمێنتی پارێزەرانی حەقیقەت لە پارکی ئازادی زیادنەکرێت.
