دواى وەرگەڕانى پاسێکى خوێندکاران بەڕێوەبەرى گشتیی پەروەردەى سلێمانى دەڵێت، دوو خوێندکار و دوو مامۆستا دۆخیان خراپە و پێویستیان بە نەشتەرگەرى و چاودێریی ورد هەیە.
مامۆستا نەژاد عەبدوڵا، بەڕێوەبەرى گشتیی پەروەردەى سلێمانى لە لێدوانێکدا بۆ رۆژنامەنووسان لە بەردەم نەخۆشخانەى شار رایگەیاند، بەهۆى رووداوى وەرگەڕانى پاسێک لە گەشتى خوێندنگایەکدا 14 خوێندکار و چوار مامۆستا و فەرمانبەر و سێ منداڵى مامۆستا و فەرمانبەر گەیەندراونەتە نەخۆشخانە.
وتیشى، بەشێکیان چارەسەرکراون، یان پێویستیان بە چارەسەر نەبووە و گەڕاونەتەوە ماڵى خۆیان.
نەژاد عەبدوڵا باسى لەوەشکرد، دوو لە مامۆستاکان و دووان لە خوێندکارەکان دۆخى تەندروستییان دژوارە و، پێویستیان بە نەشتەرگەری و چاودێریی چڕ هەیە.
کاتژمێر 4ى پاش نیوەڕۆى ئەمڕۆ پاسێک لە گەشتێکى بەهارەى خوێندکارانى خوێندنگەى برایەتیی بنەڕەتى لەکاتى گەڕانەوەدا لە سەیرانگاى کونەماسى وەرگەڕا.
