بافڵ جەلال تاڵەبانی رایگەیاند، هەوڵەکان بۆ یەکهەڵوێستی کورد بەردەوامن و یەکێتی هەموو هەوڵێک دەدات تا ئەم ئامانجە نیشتمانییە بەدیبێنێت و بە یەک ستراتیج لەگەڵ حکومەتی نوێی سووریا گفتوگۆ بکرێت.
ئەمڕۆ پێنجشەممە بافڵ جەلال تاڵەبانی سەرۆکی یەکێتیی نیشتمانیی کوردستان لە دەباشان پێشوازی لە عیرفان سدیق باڵیۆزی نوێی بەریتانیا لە عیراق کرد و لە دیدارێکدا دوایین پەرەسەندنەکانی ناوچەکە تاوتوێکرا و جەخت لە پابەندبوونی هەموولایەنەکان بۆ چارەسەرکردنی ئاشتییانەی کێشەکان و پاراستنی سەقامگیریی رۆژهەڵاتی ناوەڕاست کرایەوە.
لە کۆبوونەوەکەدا هەردوولا پەرۆشانە پێویستی پەلەکردن لە هەنگاوەکانی پێکهێنانی کابینەی نوێی حکومەتی هەرێمی کوردستانیان دووپاتکردەوە، بەشێوەیەک ببێتە مایەی بوژاندنەوەی زیاتری هەرێمی کوردستان و یەکخستنەوەی ماڵی کورد و یەکگوتاری سیاسی بەرامبەر پێشهاتەکان و گۆڕانکارییەکانی ناوچەکە.
رەخساندنی زەمینەی لەبار بۆ ئەنجامدانی هەڵبژاردنی ئەنجوومەنی نوێنەرانی عیراق و چارەسەرکردنی کێشەکانی نێوان هەولێر و بەغدا تەوەرێکی دیکەی دیدارەکە بوو کە بۆچوونیان لەبارەوە ئاڵوگۆڕکرا.
لەبارەی دۆخی سووریا و رۆژئاوای کوردستان بافڵ جەلال تاڵەبانی رایگەیاند، هەوڵەکان بۆ یەکهەڵوێستی کورد بەردەوامن و یەکێتی هەموو هەوڵێک دەدات تاوەکو ئەم ئامانجە نیشتمانییە بەدیبێنێت و بە یەک ستراتیج لەگەڵ حکومەتی نوێی سووریا گفتوگۆ بکرێت بۆ پاراستنی مافی گەلی کورد و سەقامگیری و ئارامی ناوچەکە.
