وەزارەتی ناوخۆی هەرێم رایدەگەیەنێت، لە یارییەكی گەڕی 29ی خولی ئەستێرەكانی عێراق كە لە یاریگای نەورۆز لە شاری سلێمانی لە نێوان یانەی وەرزشی زاخۆ و یانەی وەرزشی نەورۆز بەڕێوەچوو، بەداخەوە گرژی دروستبوو لە نێوان هاندەرانی هەردوو یانەكە و بووە هۆی وەستاندنی یارییەكە و بە سووكی برینداربوونی ژمارەیەك هاندەر.
هەر لە راگەیەندراوەكەدا هاتووە، بارودۆخی نەخوازراو كۆنترۆڵكراوە و هێزەكانی پۆلیسی پارێزگای سلێمانی لە گۆڕەپانەكەن بۆ ئاساییكردنەوەی دۆخەكە و پاراستنی گیانی یاریزان و هاندەران و بە فەرمانی وەزیری ناوخۆ ئەنجومەنێكی لێكۆڵینەوە دروستكرا و بەیانی سەردانی شوێنی رووداوەكە دەكات بۆ لێكۆڵینەوەكردن و دەرخستنی راستییەكان.
ئاماژە بۆ ئەوەش كراوە، داوا لە هاندەرانی هەردوو یانە و هاوڵاتییان دەكەین كە بە رۆحی وەرزشی مامەڵە بكەن و كەناڵەكانی میدیاش هاوكار بن لە بڵاوكردنەوەی رۆحی وەرزشی و برایەتی كە بەشێكن لە بنەماكانی كێبڕكێی نێوان هەموو یانەكانی كوردستان و عێراق و وەرزش بە شێوەیەكی گشتی.
