دامەزراوەی ناوەندی بۆ ڕوپێوی سەربە وەزارەتی پلاندانانی عێراق، ئەمڕۆ یەکشەممە 24ی کانونی دووەم ڕاپۆرتی خۆی سەبارەت بە ڕێژەی بەکاربەر و نرخی کاڵا و کەلوپەل بڵاوکردەوە و بەوپێیەش تێکڕای هەڵاوسان بەڕێژەی %4 بەزربووەتەوە بەراورد بە مانگی تشرینی دووەم.
عەبدولزەهرە هیداوی، وتەبێژی وەزارەتی پلاندانانی عێراق ڕایگەیاند، “ڕاپۆرتەکە نیشانیدەدات هەڵاوسان بەڕێژەی %3.3 لە مانگی کانونی یەکەمی 2020دا بەرزبووەتەوە بەراورد بە مانگی تشرینی دووەم، هەروەها هەڵاوسان بەراورد بە هەمان مانگی ساڵی 2019 بەڕێژەی %3.2 بەرزبووەتەوە ئەمەش بەهۆی گۆڕانکارییەکان لە نرخی دۆلاردا”.
ئاماژەی بەوەکردووە، “بەشی مادە توتنییەکان بەڕێژەی %10.1 بەرزبوونەوەی نرخی تۆمارکردووە، هەروەها بەشی تەندروستی و پزیشکی بەڕێژەی %8.8 بەرزبوونەوەی تۆمارکردووە، بەشی کەلوپەلی یاری و ئامرازەکانی کاتبەسەربردن بەڕێژەی %7.5، هەروەها بەشی گواستنەوە بەڕێژەی %7.2 بەرزبوونەوەی تۆمارکردووە”.
بەپێی ڕاپۆرتەکەی وەزارەتی پلاندانان، بەشی کاڵا و کەلوپەلە خۆراکییەکان بەڕێژە %4.9 بەرزبووەتەوە، هەروەها زێڕ لەسەرتاسەری وڵاتدا بەرزبووەتەوە، سەرەڕای بەرزبوونەوەی نرخی کەلوپەلی ناوماڵ و ئامێرە کارەباییەکان بەڕێژەی %3.7.
لە ڕاپۆرتەکەدا هاتووە، نرخی یەکەکان و شوێنی نیشتەجێبوون بەڕێژەی %3.2 بەرزبووەتەوە، بەشی پەیوەندیکردن بەڕێژەی %3 نرخی بەرزبووەتەوە، بەشی خواردنەوە گازییەکان و خواردنەوە ناکحولییەکان بەبڕێکی کەم بەرزبووەتەوە کە %0.5ە.
ئەنجامی کۆی گشتی ئەو ڕێژەیە دەریدەخات هەڵاوسان لە مانگی کانونی یەکەمی ساڵی 2020دا بەڕێژەی %4 بەرزبووەتەوە بەراورد بە مانگی تشرینی دووەمی هەمان ساڵ، هەروەها هەڵاوسان لە مانگی کانونی یەکەمی 2020 بەراورد بە هەمان مانگی ساڵی 2019 بەڕێژەی %4.2 بەرزبووەتەوە.
