هاتوچۆی هەولێر ئاگادارییەکی بە چوار خاڵ ئاراستەی ماتۆرسواران کرد رایگەیاند، “هاوڵاتییان بێزاربکەن دەدرێنە دادگا”
بەڕێوەبەرایەتیی گشتیی هاتوچۆی هەولێر ئاگادارییەکی ئاراستەی ئەو کەسانە کرد کە ماتۆرسکیل بەکاردەهێنن و رایگەیاند، ئەو شۆفێری ماتۆرسکیلانەی سەرپێچی یاساکانی هاتوچۆ دەکەن و دەبنە مەترسی بۆ سەر ژیانی خۆیان و هاوڵاتییان، رووبەرووی رێکاری یاسایی دەبنەوە.
ئاماژەی بەوەشدا، هەر شۆفێرێکی ماتۆرسکیل (ماتۆرسوار) پابەندیی یاساکانی هاتوچۆ نەبێت و هاوڵاتییان بێزاربکات دەدرێتە دادگا و دەستبەسەر ماتۆرەکەشیدا دەگیرێت.
هاتوچۆی هەولێر ئەوەشی خستەڕوو، لەم حاڵەتانەدا ئەفسەر و کارمەندانی هاتوچۆ سزای سەرپێچیکار دەدەن و دەستبەسەر ماتۆڕەکەیدا دەگرن:
یەکەم: هەر ماتۆرسوارێک لەسەر شەقامەکان نمایش و سەرکێشی مەترسیدار ئەنجامبدات، دەستبەسەر ماتۆرەکەیدا دەگیرێت.
دووەم: هەرماتۆرسوارێک لە ترافیک لایەتەکاندا نەوەستێت و بەخێرایی بە لەکامێراکانی تیژرەویدا تێپەڕببێت سزای دارایی دەدرێت، هەروەها ئەگەر ماتۆڕەکەی تۆمارنەکراوبێت و هەڵگری لۆگۆی کۆمپانیاکانی گەیاندن بێت، ئەوا مانگانە لیستی سزاکان بۆ کۆمپانیاکە رەوانە دەکرێت.
سێێەم: هەر ماتۆڕسوارێک کەرەستەکانی خۆپارێزی وەک: کڵاوی سەر، ئەژنۆ پارێز و مەچەک پارێز، لەکاتی لێخوڕیندا بەکار نەهێنێت، سزای دارایی دەدرێت.
چوارەم: هەر ماتۆڕسوارێک دەنگی ئەگزۆزی ماتۆڕەکەی بەرزبکاتەوە و هاوڵاتیان بەو دەنگە بەرزە بێزار بکات، دەست بەسەر ماتۆڕەکەیدا دەگیرێت و خۆشی دەدرێتە دادگا.
