وەقفی سوننیی عێراق لە بەیاننامەیەکدا رەتیدەکاتەوە، کە بەهۆی رەخنەگرتن لە دیاریکردنی یەکەم رۆژی جەژنی رەمەزان، هیچ ئیمامێک لە وتاردان دوورخرابێتەوە.
لە بەیاننامەکەدا هاتووە، “لە چەند رۆژی رابردوودا، هەندێک کەناڵی ئاسمانی و هەژماری ساختە و گوماناوی لە تۆڕە کۆمەڵایەتییەکان، هەواڵی ناڕاستیان بڵاوکردەوە و باسیانلەوەکرد، وەقفی سوننی بڕیارێکی دەرکردووە بۆ دوورخستنەوەی چەند ئیمامێک لە وتاردان”.
دەشڵێت، “ئەم هەواڵە بەتەواوەتی دوورە لە راستییەوە و ئێمە هیچ فەرمانێکی کارگێڕیمان لەوبارەیەوە دەرنەکردووە، جگە لەوەش ئەم ماوەیە هاوکاتە لەگەڵ پشووی جەژنی رەمەزان و لەئێستادا ناتوانرێت فەرمانی کارگێڕی لە هیچ بارودۆخێکدا دەربکرێت، ئەمەش ناڕاستیی ئەم هەواڵانە و نیازیخراپیی بکەران دەسەلمێنێت”.
لە ماوەی چەند رۆژی رابردوودا، لەناو بەشێک لە میدیا عێراقییەکاندا دەنگۆی ئەوە بڵاوببووەوە، چەند ئیمام و وتارخوێنێک لە بەغداد و شارەکانی دیکەی عێراق، بەهۆی رەخنەگرتنیان لە دیاریکردنی وادەی جەژنی رەمەزان لەلایەن وەقفی سوننیی عێراق، لە وتاردان دوورخراونەتەوە.
ئەمساڵ، لە هەرێم و بەشێک لە وڵاتە سوننە مەزهەبەکان، رۆژی یەکشەممە 30/3/2025 وەک یەکەم رۆژی جەژنی رەمەزان دیاریکرا و، ئێران و شیعە مەزهەبەکانی عێراقیش، رۆژی دووشەممە 31/3/2025ـیان وەک یەکەم رۆژی جەژن دیاریکرد؛ بەڵام پێچەوانەی پێشبینییەکان، دیوانی وەقفی سوننیی عێراقیش، رۆژی دووشەممەی کردە یەکەم رۆژی جەژن.
