بەڕێوەبەرایەتیی گشتیی بەرگریی شارستانیی هەرێمی کوردستان رایدەگەیەنێت، بەبۆنەی هاتنی جەژنی رەمەزان و پشووەکان، سەرجەم هێزەکانی بەرگریی شارستانی لە هەرێم خرانە حاڵەتی ئامادەباشییەوە.
بەڕێوەبەرایەتییەکە لە راگەیەندراوێکدا بڵاویکردەوە، بەبۆنەی هاتنی جەژنی رەمەزان و پشووەکانی ئەم جەژنە، لەسەر فەرمانی لیوای مافپەروەر یادگار ئەنوەر فەرەج، بەڕێوەبەری گشتیی بەرگریی شارستانیی هەرێمی کوردستان، لە رێکەوتی 29-03-2025، تاوەکو 05-04-2025، سەرجەم هێزەکانی بەرگریی شارستانی، لە تەواوی هەرێمی کوردستان خرانە حاڵەتی ئامادەباشییەوە بۆ پاراستنی سەروماڵی هاوڵاتییان.
دەشڵێت، جێبەجێکردنی پلانی جەژن بەمشێوەیە دەبێت:
1- سەرجەم بنکەکانی ناو شار و دەرەوی شار، لە ئێشکگری تەواودا دەبن.
2- تیمە گەڕۆکەکان لە شوێنە گشتییەکانی ناو شار و بازاڕەکان، جێگیردەکرێن.
3- بە هەماهەنگی لەگەڵ دیوانی پارێزگاکان و دەستەی گەشتوگوزار، تیمە گەڕۆکەکان بۆ پاراستنی گەشتیاران لە تەواوی ناوچە گەشتیارییەکان جێگیردەکرێن.
هاوکات بەرگریی شارستانیی هەرێم چەند رێنماییەکیشی بۆ هاوڵاتییان بڵاوکردووەتەوە و دەڵێت، بۆ سەلامەتیی هاوڵاتییان، ئەم رێنماییانە پەیڕەوبکەن:
1- لەکاتی روودانی هەر رووداوێک، سەرەتا پەیوەندی بە ژمارە (115) بکە بۆئەوەی تیمەکانی بەرگریی شارستانی، بەزووترین کات بگەنە شوێنی رووداوەکە.
2- ئەگەر بەمەبەستی گەشت و سەیران لە ماڵ دەرچوویت، باشترە هەموو ئامێرە کارەباییەکان بکوژێندرێتەوە، چونکە لەماوەی رابردوودا، زۆرترین حاڵەتی سووتانی ماڵان روویداوە کە بەهۆی شۆرتی کارەباوە بووە.
3- ناوچە گەشتیارییەکان بپارێزە و وریای پاشماوەی ئاگری چێشتلێنان بن، بەتەواوی بیکوژێنەوە کە کارت پێی نەما.
4- خەڵوزی نێرگەلە هۆکاری سەرەکیی رووداوی ئاگرە لە ماڵان و دەشت و دەرەکان.
5- بەهۆی کەمیی بارانبارین لە ئەمساڵدا، وشکیی خاک و بوونی پوش و پەڵاش، فڕێدانی جگەرە مەترسیدارە، بۆیە کە جگەرەکەت کێشا لە جامی ئۆتۆمۆبیلەکەت فڕێی مەدە دەرەوە، بەتایبەتی لە رێگاکانی دەرەوەی شار.
6- خاوەن هۆتێل و مۆتێلەکان و شوێنە گەشتیارییەکان دەبێت بەتەواوی رێنماییەکانی بەرگریی شارستانی جێبەجێبکەن کە پێیاندراوە، چونکە پاڵەپەستۆیەکی زۆریان لەسەر دەبێت بەهۆی هاتنی گەشتیاران لە ناوەڕاست و خوارووی عێراق.
7- شەقامەکانی دەرەوەی شار قەرەباڵغ دەبن، تکایە لەکاتی لێخوڕینی ئۆتۆمۆبێل پەیڕەوی رێنماییەکانی برایانی پۆلیسی هاتوچۆ بکەن.
8- لەو ناوچانەی ئاوی لێیە، تکایە مەلە مەکەن و ژیانی خۆتان مەخەنە مەترسییەوە.
9- دایکان و باوکان، تکایە ئەگەر بەمەبەستی گەشت چوونە دەرەوە، ئاگاداری منداڵەکانتان بن لەو شوێنانەی ئاوی لێیە، با رووداوە ناخۆشەکانی ساڵانی رابردوو دووبارە نەبنەوە.
10- لە هەموو بارودۆخێکدا، تکایە بەزووترین کات پەیوەندی بکەن بە هێڵی گەرمی بەرگریی شارستانیی ژمارە 115.
