ئەمریکا هۆشداری بە عێراق دەدات و جارێکی دیکە داوای هەڵوەشاندنەوەی گروپە چەکدارەکان دەکات.
ئەمڕۆ هەینی، میدیا جیهانییەکان بڵاویانکردووەتەوە، جۆی وێڵسن، کۆنگرێسمانی ئەمریکا پەیامێکی ئاراستەی حکومەتی عێراق کردووە و رایگەیاندووە، پێویستە سەرجەم گروپە چەکدارەکانی عێراق و لەنێویشیاندا حەشدی شەعبی هەڵبوەشێندرێنەوە.
ئاماژەیان بەوەشداوە، وێڵسن داوایکردووە بە تەواوەتی گرووپە چەکدارەکان لە عێراقدا بوونیان نەمێنێت و لەلایەن حکومەتەوە کار بۆ هەڵوەشاندنەوەیان بکرێت.
پەیامەکەی وێڵسن لە کاتێکدایە، لە ماوەکانی رابردوودا بەرپرسانی باڵای ئەمریکا پەیامیان ئاراستەی حکومەتی عێراق کردبوو، دەربارەی هەڵوەشاندنەوەی ئەو گرووپە چەکدارانەی لە دەرەوەی بازنەی دەوڵەتن و سەر بە دامەزراوە حکومییەکان نین، هاوکات بە مەترسیش ناویان هێنراوە بۆ سەر ئاسایشیی عێراق و ناوچەکە.
