وەزارەتی کارەبای عێراق بە هاوبەشی لەگەڵ کۆمپانیای ئەلمەسداری ئیماراتی پڕۆژەیەکی وزەی خۆر بە توانای هەزار مێگاوات جێبەجێدەکات.
میدیا عێراقییەکان بڵاویانکردووەتەوە، لە کۆبوونەوەیەکی نێوان زیاد عەلی وەزیری کارەبای عێراق و عەبدوڵا مەتەر باڵیۆزی ئیمارات لە عێراق، تاوتوێی جێبەجێکردنی زنجیرەیەک پڕۆژە و پلانی هاوبەشی هەردوو وڵات کراوە لەوانە جێبەخێکردنی پڕۆژەیەکی وزەی خۆر.
ئەوەشیان خستووەتەڕوو، هەردوولا لەسەر جێبەجێکردنی پڕۆژەیەکی وزەی خۆر بە توانای هەزار مێگاوات کارەبا رێکەوتوون و پێشبینی دەکرێت لە ماوەکانی داهاتوودا بە رەسمی هەنگاوەکانی جێبەجێبکرێت.
ئاماژەیان بەوەشداوە، پڕۆژەکە تایبەتە بە دروستکردنی وێستەگەیەکی بەرهەمهێنانی وزەی خۆر کە بە هاوبەشی وەزارەتی کارەبای حکومەتی عێراق و کۆمپانیای ئەلمەسداری ئیماراتی جێبەجێدەکرێت و توانای دابینکردنی رێژەیەکی باشی کارەبای هەیە.
