ئەنجومەنی نوێنەرانی عێراق کارنامەی دانیشتنی ئەمشەوی بڵاوکردەوە و پرسی بە پارێزگابوونی هەڵەبجە لە تەوەری یەکەمی گفتوگۆکەدایە.
ئەمڕۆ چوارشەممە، ئەنجومەنی نوێنەرانی عێراق کارنامەی دانیشتنی ئەمشەوی بڵاوکردەوە، کە تیایدا گفتوگۆ لەسەر حەوت پڕۆژە یاسا ئەنجامدەدرێت، کە یەکێک لە پڕۆژە یاساکان دەربارەی پرسی بە پارێزگابوونی هەڵەبجەیە.
هاوکات، شەوی رابردوو بەهۆی تەواونەبوونی رێژەی یاسایی ئەندامانی ئەنجومەنی نوێنەرانەوە دانیشتنەکە دواخرا و پرۆسەی دەنگدان لەسەر بە پارێزگابوونی هەڵەبجە ئەنجامنەدرا، هەروەها لە ئەگەری تێپەڕاندنی پرۆژە یاساکە هەڵەبجە دەبێتە 19یەمین پارێزگای عێراق.
بەپێی کارنامەی دانیشتنەکەی ئەمشەوی ئەنجومەنی نوێنەران، گفتوگۆ لەسەر حەوت تەوەر دەکرێت، کە بەشێکیان ئەمانەن (دەنگدان لەسەر بە پارێزگابوونی هەڵەبجە لە عێراق – دەنگدان لەسەر یاسای – هاوتاکردنی بڕوانامەی ئەکادیمی عەرەبی و بیانی – دەنگدان لەسەر یاسای پێشنیارکراوی هەمواری یەکەمی خوێندنی باڵای تایبەت – خوێندنەوەی دووەم بۆ رەشنووسی یاسای پێشنیارکراوی ژینگە)
