بەڕێوەبەرایەتیی ئاوی کۆیە رایدەگەیەنێت، سەرجەم پرۆژەكانی بەرهەمهێنان و دابینكردنی ئاو وەستێندرا.
بەڕێوەبەرایەتییەکە ئاگادارییەکی بڵاوکردووەتەوە و دەڵێت، بەهۆی تێكەڵبوونی ماددەی زیانبەخش بە ئاوی زێی بچوك، كە سەرچاوەی دابینكردنی ئاوە بۆ سەنتەری قەزای كۆیە، تەقتەق و ناحیەی ئاشتی و بەشێك لە گوندەكان، بەمەبەستی پاراستنی ژیانی هاوڵاتییان، سەرجەم ئەو پرۆژانەی کە ئاو لە زێی بچوک وەردەگرن، بە ناچاری وەستێندران بەهۆکاری شیاونەبوونی ئاوی بەرهەمهاتوو بۆ خواردنەوە و بەکارهێنان.
دەشڵێت، داواکارین لە هاوڵاتییان، بە وشیارییەوە ئاو بەکاربهێنن، تا ئەوکاتەی زێی بچوک پاکدەبێتەوە.
