حەمەی حەمەسەعید، وەزیری رۆشنبیری و لاوان دەڵێت،”ئیدانەی رێگریكردن لە پەخشی كەناڵ8 دەكەین”.
لە راگەیەندراوێكیدا وەزیری رۆشنبیری و لاوان كە وێنەیەكی دەست تۆڕی میدیایی ئێستا كەوتووە و تێیدا هاتووە، ئێوارەی ئەمڕۆ بۆ ماوەی كاتژمێر و نیوێك پەخشی كەناڵ 8 لە مانگی دەستكردی “نایلسات” و “یاهسات” و تۆڕی كۆمەڵایەتیی فەیسبووك راگیرا، ئێمە ئەو جۆرە تەنگپێهەڵچنینە تەكنیكییە بە مەترسی بۆ سەر ئازادیی رادەربڕین و كاری راگەیاندن دەزانین و ئیدانەی هەر جۆرە سزایەكی سیاسیی لەو جۆرە بۆ سەر پەخشی میدیایی دەكەین.
ئاماژەی بۆ ئەوەش كردووە، كەناڵ8 لە رۆژی دەستپێكردنی پەخشی بەرنامەكانی لە 18ی كانوونی دووەمی 2024 بەو پەڕی پیشەییبوون و هاوسەنگییەوە، كاری میدیایی خۆی دەكات و كەناڵێكی مۆڵەتپێدراو و دەزگایەكی رەسمیی میدیاییە لە هەرێمی كوردستاندا، هەر جۆرە ئاستەنگ دروستكردنێك بۆ پەخشەكەی، كارێكی دژ بە پرەنسیپەكانی ئازادیی رادەربڕینە و ئیدانەكراوە”.
دەشڵێت، “لە ماوەی كاركردنیشدا، كەناڵەكە سەلماندوویەتی، كە كەناڵێكی میدیایی پیشەییانە بووە، بایەخی بە دەنگ و ڕەنگی هەموو لایەنەكان داوە، رۆڵێكی ئەرێنی گێڕاوە لە زەمینەسازی بۆ پڕۆسەی ئاشتیی لە ناوچەكەدا و گواستنەوە و بەیەك گەیاندنی بیروڕا جیاوازەكان لەپێناو بوونیادنانی ئاشتی و چارەسەری دیموكراتی بۆ دۆزی كورد لە پارچەكانی دیكەی كوردستاندا”.
