هەڤاڵ ئەبوبەکر پارێزگاری سلێمانی رایگەیاند، ئامادەکاریی تەواو بۆ بەڕێوەچوونی جەژنی نەورۆز کراوە و چەندین چالاکی شایستە بەو رۆژە لە شارەکە بەڕێوەدەچێت.
هەڤاڵ ئەبوبەکر لە لێدوانێکی تایبەتدا بە تۆڕی میدیایی ئێستای راگەیاند، لەڕێی سەرۆکی یەکە کارگێڕییەکان و فەرمانگا پەیوەندیدارەکانەوە، ئامادەکاریی تەواو بۆ بەڕێوەچوونی جەژنی پیرۆزی نەورۆز و سەری ساڵی نوێی کوردیی و پێشوازیکردن لە میوان و گەشتیاران کراوە.
ئاماژەی بەوەشکرد، هەموو هاوڵاتییان بە شێوازی خۆیان ئەم یاد و جەژنە دەکەنەوە و لەژێر چاودێریی پارێزگای سلێمانی و قائیمقامییەتی مەڵبەندی سلێمانی و قایەمقامییەت و بەڕێوەبەرایەتیی ناحیەکان و سەرۆکایەتیی شارەوانیی و بەڕێوەبەرێتییە گشتییەکانی رۆشنبیریی و گەشتوگوزار و فەرمانگەکانی تردا، بە دەستپێشخەریی کۆمەڵەی کەلەپوور و فۆلکلۆری کورد و کۆمەڵەی هونەری میللیی کوردستان و رێکخراوە مەدەنییەکان و کۆمپانیا گەشتیارییەکانی وەک موون لاین، چەندین چالاکیی شایستە بە بەرزڕاگرتنی ئەم جەژنە لە چەندین شوێنی جیاجیادا بەڕێوەدەچێت.
