ڤاتیکان یەکەم وێنەی پاپا فرانسیس لە دوای تێکچوونی دۆخی تەندروستی بڵاوکردەوە و تێیدا دەردەکەوێت کە لەسەر کورسییە گەڕۆکەکەی دانیشتووە و عەبایەکی سپی و پەڕۆیەکی وەنەوشەیی لەبەردایە.
پاپای تەمەن 88 ساڵ، مانگی دووی ئەمساڵ دۆخی تەندروستیی تێکچوو و لە 14/2ـەوە، لە نەخۆشخانەی گێمێلی لە رۆما چارەسەر وەردەگرێت.
بەپێی زانیارییەکان، وێنەکە دوای مەراسیمێک گیراوە کە لەناو کەنیسەی ئەو نەخۆشخانەیەوە ئەنجامدراوە.
دەسەڵاتدارانی ڤاتیکان دەڵێن، دۆخی تەندروستیی پاپا لەئێستادا جێگیرە و پێویستی بە ئامێری هەناسەدانی دەستکرد نەماوە، بەڵام تائێستا وادەی دەرچوونی لە نەخۆشخانە دیاری نەکراوە.
