تۆمەتبارێکی رووداوەکەی شەوی رابردووی شاری سلێمانی بەناوی (ز،ح،ع) خۆی رادەستی پۆلیس کرد.
بەڕێوەبەرایەتیی پۆلیسی سلێمانی رایگەیاند، دوای ئەوەی شەوی رابردوو لە رێستۆرانتێکی شاری سلێمانی شەڕ و ئاڵۆزی دروست بوو و تەقەکرا، یەکێک لە تۆمەتبارانی هەڵکوتانەسەر رێستۆرانتەکە خۆی رادەستی هێزەکانی پۆلیس کرد.
ئاماژەی بەوەشدا، هێزەکانی پۆلیس و ئاسایشی سلێمانی بەردەوام بوون لە گەڕان و بەدواداچوونەکانیان بۆ دۆزینەوە و دەستگیرکردنی تۆمەتباران، سەرئەنجام یەکێک لە تۆمەتباران خۆی رادەستی هێزەکانی پۆلیس کرد و دەستیشگیرا بەسەر چەکێک لەجۆری دەمانچەی تورکی.
پۆلیسى سلێمانى دەشڵێت، لە ئێستادا تۆمەتبار (ز،ح،ع) بە بڕیاری دادوەر راگیراوە و لێکۆڵینەوە لە رووداوەکە بەردەوامە، هێزەکانیشیان بەردەوامن لە گەڕان بۆ دەستگیرکردنی ئەو تۆمەتبارانەی دیکە کە لەلایەن دادوەرەوە فەرمانی دەستگیرکردنیان بۆ دەرکراوە و لە داهاتووشدا هەر کەسێک فەرمانی دەستگیرکردنی بۆ دەربچێت هێزەکانیان دەستگیری دەکات.
