بافڵ جەلال تاڵەبانی، سەرۆكی یەكێتیی نیشتمانیی كوردستان رایگەیاند، پێكەوە كار دەكەن بۆ جۆشدانەوەی خەباتی ژنان و نەهێشتنی جیاكاری و هێنانەدی داواكاری و خواستەكانیان.
سەرۆكی یەكێتیی نیشتمانیی كوردستان لە راگەیەندراوێكدا بەبۆنەی 8ی مارسی تایبەت بە رۆژی جیهانی ژنان پەیامێكی بڵاوكردەوە و رایگەیاند، “لە دڵەوە پیرۆزبایی گەرم لە ژنانی كوردستان، عێراق و جیهان دەكەم و هیوادارم ئەمڕۆ سەرەتایەكی جددی و كاركردنی پێكەوەیی هەموومان بێت بۆ پارێزگاریكردن لە مافەكانی ژنان و پشتیوانیكردن لە خەباتیان و نەهێشتنی جیاكاری و هێنانەدی داواكاری و خواستەكانیان”.
ئاماژەی بەوەشكردووە، “ئێمە باوەڕی پتەو و نەگۆڕمان بە یەكسانی و فراوانكردنی بەشدارییان لە ناوەندەكانی دەسەڵات و بڕیاردا هەیە، لەسەر بنەمای ئەم پرەنسیپە چەسپاوە زەمینەی زیاتر دەڕەخسێنین بۆ ژنان تاوەكو لەناو ریزەكانی یەكێتیدا خەبات بكەن و شانبەشانی كاری رێكخراوەییان، پێكەوە خەباتی ژنان جۆشبدەینەوە و نەهێڵین لەژێر هیچ پاساوێكدا ئازادییەكانتان لێبسەندرێتەوە”.
جەختی لەوەشكردەوە، “لەم یادەدا سڵاوی وەفاداری دەنێرین بۆ هەموو ئەو ژنە تەوارانەی لە قۆناغەكانی خەباتی كوردایەتی بەشێك بوون لەكۆڕی تێكۆشان و قوربانییان بەخشیوە لەپێناو گەل و خاكەكەماندا، چ وەك ژنە پێشمەرگە و شۆڕشگێر، وەك دایك، مامۆستا، چالاكوان كە لە پێشەوەی كۆڕی تێكۆشاندا بوون، هەمیشە خۆمان بەقەرزارتان دەزانین و وەفاداری ماندوبوون و خەباتتان دەبین”.
سەرۆكی یەكێتی باسی لەوەشكردووە، “هەمیشە لەگەڵتان بووم و دەبم، پشتیوان و پارێزەری بەدیهێنانی هەموو خواستەكانتانم و لە ریزی پێشەوەی نەهێشتنی بەربەستەكانی بەردەمتان دەبم، تا ئێوەی ژنان رۆڵی گرنگتر بگێڕن لە هەرێمی كوردستان و وەك هەمیشە بەشێكبن لە سەركەوتن و گۆڕانكارییەكان لە هەموو كایەكانی ژیاندا”.
