شاڵاو هیدایەت، شارەزای بواری کەشناسی رایدەگەیەنێت، هاوینی ئەمساڵ یەکێک دەبێت لە هاوینە زۆر گەرمەکانی ناوچەکە و ئەگەری هەیە ریکۆردێکی مێژوویی تۆماربکات.
شالاو هیدایەت لە بڵاوکراوەیەکدا ئاماژەی بەوە داوە، “هاوینی داهاتوومان 2025 یەکێک دەبێت لە هاوینە زۆر گەرمەکان لە ناوچەکە و دەوروبەرمان، ئەگەر هەیه بەرزیی پلەکانی گەرما، ریکۆردێکی نوێ و تا مێژوویی تۆماربکات”.
دەشڵێت، هاوینی ئەمساڵ زۆر گەرم دەبێت و جیاواز دەبێت لە ساڵانی پێشتر، هاوکات پلەکانی گەرما بەشێوەیەکی بەرچاو دەچنە سەرووی ئاسایی و چەندین شەپۆلی گەرمای بەهێزی پڕوکێنەر، ناوبەناو ناوچەکانمان دەگرنەوە.
ئەو شارەزایەی کەشناسی باسلەوەشدەکات، شێی ئەم هاوینە لە ئاستێکی ئاسایی تا سەرووی ئاسایی وەرزانە دەبێت، ئەمەش کاریگەریی دەبێت لەسەر زیادکردنی گەرما و وادەکات، گەرمیی هەستپێکراو لەچاو تۆمارکراو و پێشبینیکراو زیاتر بێت.
