بافڵ جەلال تاڵەبانی، سەرۆکی یەکێتیی نیشتمانیی کوردستان، لە دەباشان پێشوازیی لە د. لەتیف جەمال رەشید، سەرۆککۆماری عێراق کرد.
لەمیانی دیداری نێوانیان، هەڵسەنگاندن بۆ دۆخی گشتیی وڵات کرا و جەخت لە بەردەوامیی گفتوگۆی بونیادنەرانە لەنێوان سەرجەم لایەنەکان کرایەوە بۆ زاڵبوون بەسەر ئاڵنگارییەکاندا و بەرزکردنەوەی ئاستی خزمەتکردنی هاوڵاتییان.
پەیوەست بە کێشەکانی هەرێمی کوردستان و عێراق، لە دیدارەکەدا هەردوولا پەرۆشانە جەختیان لە چارەسەرکردنی کێشەکان لەسەر بنەمای دەستوور و لێکتێگەیشتنەکان کردەوە. لەورووەوە سەرۆک بافڵ بەڕێزەوە رۆڵ و هەوڵەکانی سەرۆککۆماری بەرز نرخاند بۆ لەیەک نزیککردنەوەی لایەنە جیاوازەکان و گەیشتن بە چارەسەری نیشتمانی لە بەرژەوەندیی سەقامگیریی وڵاتدا و روونیکردەوە، یەکێتی هەموو هەوڵێک دەدات بۆ باشترکردنی ژیانی خەڵکی هەرێمی کوردستان و دوورخستنەوەیان لە ململانێ سیاسییەکان کە خۆشبەختانە لەم هەنگاوەشدا سەرکەوتوو بووین.
پەیوەست بە قەیرانی ناوچەیی و پێشهاتەکانی رۆژهەڵاتی ناوەڕاست، لە دیدارەکەدا گفتوگۆی ورد کرا و د. لەتیف جەمال رەشید پەرۆشانە رایگەیاند، عێراق پشتگیری لە هەر هەوڵ و دەستپێشخەرییەک دەکات کە ئامانج لێی دۆزینەوەی رێگاچارەی ئاشتییانە بێت بۆ پاراستنی ئارامی و دوورخستنەوەی ناوچەکە لە شەڕ و ئاڵۆزی.
