وەزارەتی پلاندانان ئەنجامی بنەڕەتی سەرژمێریی گشتی راگەیاند

وەزارەتی پلاندانانی عێراق ئەنجامی بنەڕەتی سەرژمێریی گشتیی دانیشتووانی بڵاوکردەوە و رایگەیاند، ژمارەی دانیشتووان 46 ملیۆن و 118 هەزار کەسە.

وەزارەتی پلاندانانی عێراق رایگەیاند، بەپێی ئەنجامی سەرژمێریی گشتیی دانیشتووان، ژمارەی دانیشتووانی عێراق 46 ملیۆن و 118 هەزار کەسە، بەم پێیەش بەراورد بە سەرژمێریی ساڵی 1957 ژمارەی دانیشتووان 39 ملیۆن و 618 هەزار کەس زیادیکردووە.

ئاشکراشیکرد، 70.17% دانیشووان لە شارەکاندا نیشتەجێن، 29.83% یان لە گوندەکان.

سەبارەت بە هەرێمی کوردستانیش پلاندانانی عێراق ئاشکرایکردووە، 84.57% یان لە شار و 15.43% لە گوندەکان دەژین.

هەر بەپێی ئەنجامی سەرژمێرییەکە، 72.15% ی دانیشتووانی عێراق خاوەنی خانووی خۆیانن، لە هەرێمی کوردستانیش رێژەکە 70.19% یە.