بەپێی پێشبینییەکانی کەشناسیی هەرێم، بۆ 48 کاتژمێری داهاتووی ناوچەکانی هەرێم، ئەگەری بەفربارین و دروستبوونی شەختە هەیە و پلەی گەرمی نزمدەبێتەوە.
ئەمڕۆ یەکشەممە، بەڕێوەبەرایەتیی کەشناسیی و بوومەلەرزەزانی هەرێم، پێشبینییەکانی بۆ کەشوهەوای ئەمڕۆ و سبەینێی شارەکانی هەرێم خستەڕوو و رایگەیاند، کەشوهەوا سارد و نیمچە هەوردەبێت، لە چەند ناوچەیەکی جیاوازیشدا لە ئەگەری هەر دابارینێکدا بە شێوەی بەفر دەبێت، و لە شەویشدا دیاردەی بەستن و دروستبوونی شەختە روودەدات.
ئاماژەی بەوەشداوە، پلەی گەرمی بەراورد بە پلەی تۆمارکراوی دوێنێ، چەند پلەیەک نزمدەبێتەوە و مەودای بینین لەناوچە بەرزەکاندا کەمدەبێتەوە بۆ چوار بۆ شەش کیلۆمەتر.
هەروەها نزمترین پلەی گەرمی تۆمارکراو لە دهۆک و زاخۆ دەبێت بە سفر پلەی سیلیزی و بەرزترین پلەی گەرمیش لە گەرمیان دەبێت بە 5 پلەی سیلیزی.
سەبارەت بە کەشوهەوای سبەینێ، ئەوەش خراوەتەڕوو، کەشوهەوا سارد دەبێت و دیاردەی بەستن و شەختە روودەدات، هەروەها ئاسمان هەور دەبێت لە ناوچە شاخاوییەکاندا، و پلەی گەرمیش بەراورد بە پلەی تۆمارکراوی ئەمڕۆ (یەک بۆ دوو) پلە نزم دەبێتەوە.
