ئەندامێكی لیژنەی نەوت و گاز لە ئەنجومەنی نوێنەرانی عێراق رایدەگەیەنێت، هیچ گەرەنتییەك نییە بۆ خەرجكردنی پارەی دەرهێنانی نەوت و كێ ناڵێت وەك مووچەی لێنایەت.
سەباح سوبجی، ئەندامی لیژنەی نەوت و گاز لە ئەنجومەنی نوێنەرانی عێراق بە دەنگی ئەمەریكای راگەیاند، ئەو زانیاریيانەی كە ئێمە هەمانە ئەوەیە نەوتی كوردستان دەبێت هەناردە بكرێت و لەلایەن ویلایەتە یەكگرتووەكانی ئەمریكاوە نامە نێردراوە بۆ حكومەتی عێراق بۆ ئەوەی بەزووترین كات هەنگاوەكان دەستپێبكات بۆ هەناردەكردنی نەوت و لە رووی یاساییەوە تەواومانكردووە، تەنها ئەوە ماوە بڵاوبكرێتەوە لە رۆژنامەی وەقایع.
وتیشی،”كە بڵاوكرایەوە ئەو كات راستەوخۆ یاساكە دەبێت جێبەجێبكرێت لەو حاڵەتەدا چاوەڕوانی لایەنە تەكنیكیيەكانین، چونكە هەر یاسايەك پێویستی بە رێنمایییە و پێویستی بە ئیجرائاتە تاوەكو ئەو نەوتە هەناردەبكرێت.”
سەباح سوبحی ئاماژەی بۆ ئەوەشكرد پێویستە گەرەنتی هەبێت و روون و ئاشكرا بێت و بەشێوازێك بێت وەكو مووچەی لێنەیەت جارێك بینێرن و دوو مانگ نەینێرن.
دەشڵێت،” ئەو بڕە پارەیە مافی كۆمپانیاكانە و دەبێت بە تەواویی بگاتە دەستیان و دڵنیایی بدرێت، هەرچەند دڵنیایی دراوە، بەڵام ئێمە زۆر یاسامان هەیە لە عێراق جێبەجێناكرێت.”
