لەتیف نێروەیی، لێپرسراوی بۆردی راگەیاندنی یەكێتیی نیشتمانیی كوردستان رایگەیاند، سێ هەواڵی دڵخۆشكەر بۆ گەلی كوردستان لە یەك رۆژدا كە جێبەجێكردنی دوو بەڵێنی یەكێتی بوون لە بانگەشەی هەڵبژاردندا و هەواڵێك بۆ فەرمانبەران و مووچەخۆرانی هەرێم و هەواڵی دووەم بۆ جووتیارانی ناوچەدابرێنراوەكان و هەواڵی سێیەمیش پەیوەستە روڵی یەكێتی لە پڕۆسەی ئاشتی لە توركیا و باكووری كوردستان.
ئاماژەی بۆ ئەوەش كردووە، بڕیارەكان بریتین لە یەكەم: پەسەندكردن و بڕیاردان لەسەر سكاڵایەكی سەرۆك كۆمار و سەرپشككردنی فەرمانبەرانی هەرێم بە تەوتینكردنی مووچەكانیان و ئەمە یەكێك بوو لە دروشم و بەڵێنە سەرەكییەكانی یەكێتی و خودی بافڵ جەلال تاڵەبانی سەرۆكی یەكێتی.
دووەم: یەكلاكردنەوەی پرسی زەویی جووتیارانی كەركوك و سزادانی كەسانی پەلاماردەر و یاساشكێن، ئەمەش بەڵێنێكی دیكەی یەكێتی بوو لە بانگەشەی هەڵبژاردنی ئەنجومەنی پارێزگای كەركوك.
سێیەم: پەیام و پشتگیری و پێشوازیی یەكێتی و سەرۆكی یەكێتی لە هەنگاوەكانی جێبەجێكردنی پڕۆسەی ئاشتی لە توركیا كە كاریگەریی ئەرێنی لەسەر باشووری كوردستان و رۆژئاوای كوردستانیش دەبێت و لەو پێناوەدا یەكێتی لە سەرەتای نەوەتەكانی سەدەی رابردووەوە تا ئێستا وەكو ستراتیژێكی نەگۆر هەوڵ و باجێكی زۆری داوە.
