پارێزگاری كەركوك رایدەگەیەنێت،”ئەو سەربازانەی كە ئەمڕۆ لە گوندی شەناغە پەلاماری جووتیارانی كوردیاندا، دەستبەسەركراون و لیژنەی لێكۆڵینەوەیان لەسەر پێكهێنرا”.
رێبوار تەها پارێزگاری كەركوك رایگەیاند، كێشەی زەوی و زاری جووتیاران بە گشتی كێشەیەكی قووڵ و ماوە درێژە، لەگەڵ دەستبەكاربوونمان هەوڵی جددیمان داوە بۆ چارەسەركردنی، ئەم كێشەیە چارەسەری لە حكومەتی ناوەندە و بۆ ئەو مەبەستە هەفتەی رابردوو لەبەغدا بووم و نووسراوی رەسمیمان ئاراستەی نووسینگەی سەرۆك وەزیرانی عێراق كرد، بۆ جیاكردنەوەی ئەو زەوییانەی كە بڕیاری دادگایان لەسەر نییە، تا جووتیاران بتوانن كاری كشتووكاڵی خۆیان بكەن و هەموو هەنگاوەكان بەئاراستەی چارەسەركردن بوون.
دەشڵێت، “هەر لەپێناو چارەسەركردنی كێشەی زەوی و زار، بەر لە دوو هەفتە بڕیارماندا گرێبەست بكرێت بۆ هەموو زەوییە كشتوكاڵییەكانی سنووری تۆپزاوا و یایچی و تركەڵان كە ماوەی حەوت ساڵ كێشەیان هەبوو، بۆیە لەسنووری سەرگەڕانیش هەنگاومان بۆ چارەسەركردنی كێشەكان ناوە”.
ئاشكراشیكرد، ئەو سەربازانەی كە ئەمڕۆ لە گوندی شەناغە پەلاماری جووتیارانی كوردیاندا، دەستبەسەركراون و لیژنەی لێكۆڵینەوەیان لەسەر پێكهێنرا و لایەنە پەیوەندیدارەكانیشمان ئاراستەكرد بۆ كشانەوەی هێزە سەربازییەكان لەو سنوورە.
وتیشی، “لە دوای پەیوەندییمان و ئاگاداركردنەوەی سەرۆك وەزیران بڕیاریدا بە ناردنی لیژنەیەك بەسەرۆكایەتی بریكاری وەزیری داد بۆ هەڵسەنگاندنی دۆخەكە، سبەینێش لە دیوانی پارێزگا كۆبوونەوەیەكی تایبەتمان لەگەڵیان دەبێت و جارێكی دیكە جەختدەكەینەوە كە هێوری و خۆڕاگريی جووتیارانی سنووری سەرگەڕان لەبەرژەوەندیی چارەسەركردنی كێشەكەدایە”.
