وەزارەتی خوێندنی باڵا و توێژینەوەی زانستی رایگەیاند، بە بڕیارى وەزیرى خوێندنى باڵا کەسوکارى پێشمەرگە کەمئەندامبووەکانى سەنگەر لە کرێى خوێندن دەبەخشـرێن.
وەزارەتی خوێندنی باڵا و توێژینەوەی زانستیی هەرێم لە راگەیەندراوێکدا بڵاویکردەوە، “لە گشتاندنێکدا بۆ سەرجەم زانکۆکانى هەرێمى کوردستان، د. ئارام محەمەد قادر، وەزیرى خوێندنى باڵا و توێژینەوەى زانستى بڕیاریداوە بە لێخۆشبوون لە کرێى خوێندنى پارالێڵ و ئێواران بۆ ئەو قوتابى و خوێندکارانەى کەسوکارى پێشمەرگەکانى کەمئەندامانى سەنگەرن”.
باس لەوەشدەکات، بە نووسراوى ژمارە (2889) لە 9ی شوباتی 2025 کە بە واژووی د. ئارام محەمەد قادر، وەزیرى خوێندنى باڵا و توێژینەوەى زانستى دەرچووە و پاڵپشتە بە ماددەى حەوتەم خاڵى چوارەم لە یاساى خانەنشینى کەمئەندامانى پێشمەرگە ژمارە (34)ى ساڵى 2007، تایبەت بە مافى فێرکردنى بە خۆڕایی بۆ هاوسەر و منداڵەکانى پێشمەرگەکانى کەمئەندامانى سەنگەر، تیایدا هاتووە: کارى پێویست ئەنجامبدرێت بۆ لێخۆشبوون لە کرێى خوێندنى پارالێڵ و ئێواران بۆ ئەو قوتابى و خوێندکارانەى کەسوکارى پێشمەرگەکانى کەمئەندامانى سەنگەرن، بە مەرجێک بەڵگەنامەى پێویست بۆ ئەم مەبەستە پێشکەشبکەن.
