بەڕێوەبەرایەتیی شوێنەوار و کەلەپووری پارێزگای دهۆک سکاڵا لەسەر کۆمپانیای (لێکزس)ـی ژاپۆنی تۆماردەکات و دەڵێت، ئەو کۆمپانیایە زێدەڕەویی کردووەتە سەر ناوچەیەکی شوێنەواریی و زیانی پێگەیاندووە.
بەڕێوەبەرایەتییەکە لە راگەیەندراوێکدا بڵاویکردووەتەوە، سکاڵاکەیان لە داواکاریی گشتیی پارێزگاکە و دادگای شێخان تۆمارکردووە، بەهۆی ئەو “زێدەڕەوییەی” لەلایەن کۆمپانیای (لێکزس) کراوەتە سەر ناوچەیەکی شوێنەواریی لە سنووری پارێزگای دهۆک و بەهۆیەوە زیان بەر شوێنەوارەکە کەوتووە.
بێکەس بریفکانی، بەڕێوەبەرای شوێنەوار و کەلەپووری پارێزگای دهۆک دەڵێت، کۆمپانیاکە بەبێ ئاگاداریی ئەوان، ئەو بەربەستە گڵییەی حەرەمی ناوچەی قەدەغەکراوی ناوچەیەکی شوێنەواریان بەزاندووە و بوونەتە مایەی زیانگەیاندن بە شوێنەوارەکە.
دەشڵێت، “دەبێت کۆمپانیاکە ڕووبەڕووی توندترین سزا بکرێتەوە”.
کۆمپانیای لێکزس بۆ نمایشکردنی مۆدێلێکی ئۆتۆمبێل، چووەتە سنووری شارۆچکەی شێخان و لەسەر شوێنەواری کەناڵی جەروانە نمایشێکی کردووە و بڵاویکردووەتەوە.
