وتەبێژی یەکێتیی نیشتمانیی کوردستان لەبارەی مووچەوە رایدەگەیەنێت، کێشەی هەرێم و بەغداد تەنیا مووچە نییە و مووچەش بابەتێک نییە کە چارەسەری نەبێت.
سەعدی ئەحمەد پیرە، وتەبێژی یەکێتیی نیشتمانیی کوردستان لە لێدوانێکدا رایگەیاند، “کێشەی هەرێم و بەغداد تەنیا مووچە نییە و کێشەکە سیاسییە، ئێمە لە وڵاتێکی فرەنەتەوە و فرە حزبی سیاسیداین، بۆیە هەرێمێک لەگەڵ حکومەتێکی فیدراڵ کێشەمان هەر دەبێت”.
وتیشی، پێموانییە بابەتی مووچە بابەتێک بێت کە چارەسەری نەبێت، ئومێدەوارین بابەتی مووچە بە هەموو کەموکوڕییەکانییەوە ببێتە بابەتێکی چارەسەرکراو و لەبیربکرێت.
سەعدی پیرە لە بەشێکی تری قسەکانیدا ئاماژەی بەوەشکرد، راستە مووچە بابەتێکی گرنگە، بەڵام ئێمە کێشەی ماددەی 140، تەعریب، تیرۆریشمان هەیە، سنوورەکانمان دوودڵن، هەڕەشەمان لەسەرە، بۆیە دەبێت ئەوانەش لەبیرنەکەین.
