دەزگای ئاسایشی هەرێم، رایگەیاند، “تۆمەتباری رووداوی وەرگەڕانی ئۆتۆمبێلەکەی رێگای پێنجوێن-سلێمانی دەستگیرکرا”.
دەزگای ئاسایشی هەرێم، لە راگەیەندراوێکدا بڵاویکردەوە، دوای ئەوەی شەوی 5ی شوباتی 2025، رووداوی وەرگەڕانی ئۆتۆمبێلی خێزانێک لەسەر رێگای سلێمانی_پێنجوێن، بووەهۆی گیانلەدەستدانی شۆفێری ئۆتۆمبێلەکە و برینداربوونی یەکێک لە سەرنشینانی، دەستبەجێ دەزگای ئاسایشی هەرێم دەستیکرد بە بەدواداچوون و لێکۆڵینەوە لەسەر هۆکاری روودانی رووداوەکە، سەرئەنجام دەرکەوت هۆکارەکە دروستبوونی شەڕ و دەمەقاڵێ بووە لەنێوان دوو شۆفێر لەناحیەی ناڵپارێز، یەکێک لەشۆفێرەکان بە چەقۆ هێرش دەکاتە سەر شۆفێری بەرامبەری و برینداری دەکات و دواتر شوێنی دەکەوێت، دەبێتە هۆی وەرگەڕانی ئۆتۆمبێلەکە و گیانلەدەستدانی شۆفێرەکە و برینداربوونی یەکێک لە سەرنشینانی ئۆتۆمبێلەکە، دواتر تۆمەتباری رووداوەکە هەڵات.
باس لەوەشدەکات، “پاش وەرگرتنی بڕیاری دادوەری لێکۆڵینەوەی ئاسایش بەدواداچوون و لێکۆڵینەوە لەسەر رووداوەکە کرا و تۆمەتباری رووداوەکە دەستنیشانکرا، تۆمەتبار خۆی رادەستی هێزەکانی ئاسایش کرد و رووبەڕوی یاسا کرایەوە”.
ئاماژە بەوەشدەکات، “ئێستا تۆمەتباری رووداوەکە لەلایەن بەڕێوەبەرایەتیی ئاسایشی سلێمانی دەستگیرکراوە و لێکۆڵینەوە لە کەیسەکەی بەردەوامە”.
