پەرلەمانتارێك رایدەگەیەنێت، مەترسیی هەرەسهێنانی ئابوریی وڵات هەیە و “لە ئەگەری دابەزینی نرخی نەوت، حكومەت ناتوانێت مووچەی فەرمانبەران بدات”.
عامر عەبدولجەبار، ئەندامى ئەنجومەنى نوێنەرانى عێراق لە لێدوانێكدا رایگەیاند، ئەو سیاسەتە نەختینەیەی بانكی ناوەندیی عێراق پەیڕەوی دەكات، شكستخواردووە و بەمنزیكانە ئەو سیاسەتە دەبێتە هۆی هەرەسهێنانی ئابوریی وڵات.
وتیشی، “پارێزگای بانكی ناوەندی فرۆشتنی دۆلاری گەیاندووەتە 300 ملیۆن دۆلار لە رۆژێكدا، ئەوەش كارێكی مەترسیدارە و ئاماژەیە بۆ زیادبوونی سپیكردنەوەی پارە و بردنەدەرەوەی دراوی بیانی، هەموو ئەوانەش دەبنە هۆی دروستبوونی هەرەسهێنانی ئابوری و كەموكوڕیی گەورە لە پارەی نەختینەدا”.
ئەو پەرلەمانتارە هۆشداریشیدا لەوەی، لەگەڵ دابەزینی نرخی نەوت، حكومەت رووبەڕووی ئاستەنگ دەبێتەوە لە دابینكردنی مووچەی مانگانەی فەرمانبەران و ناتوانێت وەك پێویست پارە دابینبكات.
