دەزگای ئاسایشی هەرێم دەستگیرکردنی تۆمەتباری کوشتنی گەنجەکەی قەزای رانیەی راگەیاند.
لە راگەیەندراوێکی دەزگای ئاسایشی هەرێمدا هاتووە، دوای ئەوەی بەرەبەیانی رۆژی یەکشەممە لە گەڕەکی شەهیدانی شاری رانیە، بەهۆی دروستبوونی گرژی و ئاڵۆزی لەنێوان چەند گەنجێکدا کەسێک بەناوی ژیناڵ ئیبراهیم کەریم، لە دایکبووی ساڵی 2004 کوژرا و سێ کەسیش برینداربوون، تۆمەتباری رووداوەکە هەڵات.
ئاماژەی بەوەشکرد، پاش رووداوەکە بەڕێوەبەرایەتیی ئاسایشی راپەڕین دەستبەجێ لێکۆڵینەوە و بەدواداچونیان لەسەر رووداوەکە ئەنجامدا و بە بڕیاری دادوەری لێکۆڵینەوەی ئاسایش لەماوەی کەمتر لە 24 کاتژمێر بکوژەکەیان بەناوی ( م ، م ، أ ) دەستگیرکرد کە لە گوندی زهنگڵان لە پشدەر کە لە هەوڵی دەربازبونیدا بووە بۆ ئەودیو سنوورەکانی هەرێمی کوردستان.
ئاشکراشیکرد، لە ئێستادا تۆمەتبار بەپێی ماددەی 406 لە یاسای سزادان راگیراوە و دانی بە تاوانەکەیداناوە و لێکۆڵینەوە لە دۆسییەکەی بەردەوامە.
