بەڕێوەبەرایەتیی رەگەزنامە و باری شارستانیی سلێمانی رایدەگەیەنێت، ئەو هاوڵاتییانەی كارتی نیشتمانییان گەڕاوەتەوە و نەیانبردووەتەوە، ئەگەر سەردانی بەڕێوەبەرایەتییەكە نەكەن، ئەوا كارتەكەیان بۆ بەغداد دەگەڕێندرێَتەوە.
بەپێی راگەیەندراوێكی بەڕێوەبەرایەتیی رەگەزنامە و باری شارستانیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، هەر هاوڵاتییەك كارتی نیشتمانییەكەی نەباتەوە، كارتەكەی بۆ بەغداد دەگەڕێنرێتەوە.
ئاماژە بۆ ئەوەش كراوە، “ئەو هاوڵاتییانەی كە لە ساڵەكانی 2016 بۆ 2025 هاتوون مامەڵەی كارتی نیشتمانییان كردووە و تاوەكو ئێستا نەهاتوونە كارتەكانیان وەربگرنەوە داواكارین بەزووترین كات سەردانی بەڕێوەبەرایەتیی رەگەزنامە و باری شارستانیی سلێمانی و سەرجەم فەرمانگەكانی كارتی نیشتمانی بكەن، بە مەبەستی وەرگرتنەوەی كارتی نیشتمانییەكانیان”.
بەڕێوەبەرایەتییەكە باسیلەوەشكردووە، لە كاتی گەڕانەوەی كارتەكە بۆ بەغداد، هاوڵاتی دەبێت خۆی سەردانی بەغداد بكات و مامەڵەی بۆ بكات بۆ وەرگرتنەوەی كارتەكەی، بەمەش تێچوو و ئەركێكی زۆر دەكەوێتە سەریان و داواكارین پەلە بكەن و سەردانمان بكەن”.
