نێردەی نەتەوە یەكگرتووەكان جەختدەكاتەوە لەوەی پێویستە هەمواری یاساكان پێچەوانەی پابەندییە نێودەوڵەتییەكانی عێراق نەبێت.
نێردەی نەتەوە یەكگرتووەكان بۆ عێراق (یۆنامی) لە راگەیەندراوێكدا بڵاویكردەوە، یۆنامی چاودێریی دوایین گۆڕانكارییەكانی پەیوەست بە پەسەندكردنی هەمواری یاسای باری كەسێتیی ساڵی 1959 لەلایەن ئەنجومەنی نوێنەرانی عێراق دەكات، هاوكاتی هەندێك یاساداڕێژیی دیكە.
جەختیشیدەكاتەوە لەسەر گرنگیی زامنكردنی ئەوەی چاكسازییە یاساییەكان گونجاو بێت لەگەڵ پابەندییە نیودەوڵەتییەكانی عێراق لە بواری مافەكانی مرۆڤ، بەتایبەت ئەوەی پەیوەندیدارە بە پاراستنی مافەكان و خۆشگوزەرانیی ژن و منداڵ، بەجۆرێك لە ئاست خواست و داواكارییەكانی گەلی عێراقدا بێت و، پارێزگاری لە پێشكەوتن و دەستكەوتە مێژووییەكان بكات.
یۆنامی لە راگەیەندراوەكەیدا ئاماژەشدەدات، پەیوەندیی چڕیان لەگەڵ لایەنە پەیوەندیدارە عێراقییەكان گرێداوە و، جەختیان كردووەتەوە لەسەر گرنگیی ئەنجامدانی گفتوگۆی بونیادنەرانە و فراوان لەم بوارەدا، درێژەش بە هەوڵەكانیان دەدەن، نەتەوە یەكگرتووەكانیش پاڵپشتیی عێراق دەبێت لە خواست و هەنگاوەكانی بەرەو دەوڵەتی یاسا و رێزگرتن لە مافەكانی مرۆڤ.
