مەكتەبی سیاسیی یەكێتیی نیشتمانیی كوردستان لە پەیامێكدا بەبۆنەی هەڵوەشاندنەوەی بڕیارەكانی ئەنجومەنی سەركردایەتیی شۆڕش پیرۆزبایی لە خەڵكی كەركوك و ناوچە دابڕاوەكان دەكات و رایدەگەیەنێت، “هەڵوەشانەوەی بڕیارەكانی زەوتكردنی زەوی و زاری خەڵك لە كەركوك و هەر شوێنێكی تری ناوچە دابڕاوەكان چەسپاندنی دادپەروەری و سەلماندنی مافی خەڵكە”.
ئاماژە بۆ ئەوەش كراوە، مەكتەبی سیاسیی یەكێتیی نیشتمانیی كوردستان پیرۆزبایی لە خەڵكی كەركوك و ناوچە دابڕاوەكان، بەتایبەتی جووتیارانی كورد و توركمان دەكات كە دوای نزیكەی پەنجا ساڵ لە داگیركردنی زەوی و زاریان لەسەردەمی رژێمی پێشووی بەعسدا دەكات كە ئەمڕۆ ئەنجومەنی نوێنەرانی عێراق بە دەنگدان لەسەر یاسای هەڵوەشاندنەوەی بڕیارەكانی ئەنجومەنی سەركردایەتیی شۆڕشی هەڵوەشاوە، مافی بۆ گەڕاندنەوە و وەكو خاوەنی رەسەنی ئەو موڵك و خاكە ئینسافیكردن.
راشیدەگەیەنێت، “بەم بۆنەشەوە دەستخۆشی لە سەرۆكایەتی ئەنجومەنی نوێنەران و فراكسیۆنەكانی دەنگیان لەسەر ئەم یاسایە دا دەكەین كە بەو پەڕی بەرپرسیاریی و گیانی نیشتمانییەوە لەگەڵ ئەم دۆسیە هەستیارەی مافی هاونیشتمانیانی وڵاتەكەماندا هەڵسوكەوتیان كرد و هەر وەك پیرۆزبایی و دەستخۆشیش لە یەكدەستیی فراكسیۆنە كوردستانییەكان و بەتایبەتیش كۆششی فراكسیۆنی سەوز و تیمی یەكێتی لە بەغداد دەكەین كە هەوڵی بێووچانیان بۆ كۆدەنگی لەسەر ئەم پرسە خستەگەڕ”.
هەر لە پەیامەكەی مەكتەبی سیاسیی یەكێتیدا هاتووە، وەك یەكێتیی نیشتمانیی كوردستان پێمانووایە هەڵوەشانەوەی بڕیارەكانی زەوتكردنی زەوی و زاری خەڵك لە كەركوك و هەر شوێنێكی تری ناوچە دابڕاوەكان چەسپاندنی دادپەروەری و سەلماندنی مافی خەڵكە كە سەرئەنجام ژینگەی پێكەوەژیانی هاوڵاتییان و رێگای ئاشتەوایی نێوان پێكهاتەكان لە عێراقی نوێ ئاوەدانتر دەكات”.
