ئەمڕۆ ئەنجومەنی نوێنەرانی عێراق پڕۆژە یاسای گەڕاندنەوەی موڵك و ماڵی پەسەند كرد، وەزیری دادی عێراقیش دەڵێت: “پڕۆژەیاساكە زیان لە هیچ لایەنێك نادات و ئەوانەی زیانیان پێدەگات قەرەبوودەكرێنەوە”.
خالید شوانی وەزیری دادی عێراق راشیگەیاند،” بە كۆی دەنگ پڕۆژەیاسای هەڵوەشاندنەوەی ئەنجومەنی سەركردایەتیی شۆڕشی رژێمی بەعسی پەسەندكرا كە تایبەتە بە گەڕانەوەی موڵك و ماڵی ئەو جووتیارانەی كە بەهۆی بڕیارەكانی بەعسەوە لێیان داگیركرابوو، كە زیاتر ناوچە جێناكۆكەكان لێی زەرەرمەندبوون”.
دەشڵێت،”ئەم پڕۆژە یاسایە هەموو ئەو بڕیارانە دەگرێتەوە كە خۆی لە 9 بڕیار دەبینێتەوە و لە ساڵی 1976 بەدواوە زەوییە كشتوكاڵییەكانی كورد و توركمانی پێداگیر كراوە”.
وەزیری دادی عێراق راشیگەیاند: “سوپاسی سەرۆك وەزیران و تێكڕای ئەندامانی ئەنجومەنی وەزیران دەكەم، كە بە تێكڕا دەنگیان بە پڕۆژەیاساكە داو هەر ئەمڕۆش توانرا لە ئەنجومەنی نوێنەران دەنگی لەسەر بدرێت”.
راشیگەیاند: “ئەو یاسایەی زیاتر لە 20 ساڵە كاری لەسەر دەكەین، هەڵوەشاندنەوەی دەستكەوتێكی گەورەیە كە دەیان ساڵە بەو یاسایە زوڵم لە جووتیارانی كورد و توركمان دەكرێت، بەدەرچوونی یاساكەش بەشێكی گەورەی پڕۆسەی بەعەرەبكردن كە لەسەردەمی ڕژێمی پێشوو جێبەجێكراوە هەڵوەشایەوە”.
لە كۆتایی وتەكانیشیدا وەزیری داد راشیگەیاند: “پڕۆژەكە بەشێوەیەك دەرچووە كە زیان بە هیچ پێكهاتەیەك لە ناوچە جێناكۆكەكان ناگەیەنێت و ئەوانەشی بەهۆی ئەم یاساییەوە زیانیان پێدەگات قەرەبوو دەكرێنەوە”.
