وەزارەتی ئاوەدانكردنەوە و نیشتەجێكردنی هەرێم رایدەگەیەنێت، لە چوارچێوەی كارەكانی وەزارەتی ئاوەدانكردنەوە و نیشتەجێكردن، لەلایەن تیمەكانی راماڵینی بەفرەوە رێگای ملەكەوە لە قەزای پێنجوێن پاككرایەوە و لە ئێستادا هاتوچۆ ئاساییە.
لە راگەیەندراوەكەی وەزارەتی ئاوەدانكردنەوەدا هاتووە، دوای ئەو شەپۆلی بەفربارینەی ناوچەكەی گرتەوە و ئاستەنگی هاتوچۆی دروستكردبوو كە لەلایەن تیمەكانی بەڕێوەبەرایەتیی چاككردن و پاراستنی رێگاوبانی سلێمانی و بەڕێوەبەرایەتیی چاككردن و پاراستنی رێگاوبانی پێنجوێن بە هاوكاریی پۆلیسی هاتوچۆی پێنجوێن رێگاكە پاككرایەوە.
دەشڵێت، “تیمەكان لە ئەركدا دەبن بۆ نەهێشتنی ئاستەنگی هاتوچۆ و راماڵینی بەفر و پاككردنەوەی رێگاوبانەكان”.
