وەزارەتی خوێندنی باڵا و توێژینەوەی زانستیی هەرێمی کوردستان بڵاویکردەوە، لە ئەنجامى سەردانى وەزیرى خوێندنى باڵا بۆ تورکیا، ئەم وڵاتە 13 دەرفەتی خوێندن پێشکەش بە فێرخوازان لە هەرێمى کوردستان دەکات.
وەزارەتی خوێندنی باڵا و توێژینەوەی زانستی بڵاویکردەوە، وڵاتى تورکیا 13 کورسىی خوێندنى ماستەر و دکتۆرا لە بوارى جیاجیا پێشکەش بە وەزارەتی خوێندنی باڵا کردوە، بۆ ئەم مەبەستە مامۆستایان و فەرمانبەرانى وەزارەتى خوێندنى باڵا و سەرجەم وەزارەتەکانى دیکە ئاگاداردەکاتەوە، دەتوانن داواکارى بۆ پێشکشەکردنى ئەم دەرفەتە پێشکەش بکەن بەم شێوەیەى خوارەوە:
– هەشت کورسی بۆ دامودەزگاکانی وەزارەتی خوێندنی باڵا و توێژینەوەی زانستی.
– پێنج کورسی بۆ وەزارەتەکانی دیکە.
باس لەوەشکراوە، هەر کەسێک سەرباری مەرج و رێنماییەکانی دەرفەتی خوێندنی تورکیا، ئەم مەرجانەی خوارەوەی تێدا بەرجەستە بێت و ئارەزوی خوێندن لە وڵاتی تورکیا بکات بە لەبەرچاوگرتنی ئەم تێبینیانەی خوارەوە داواکاری لە رێگەی ئەم لینکەی خوارەوە پێشکەش بە سەرچاوەکە بکەن:
https://turkiyeburslari.gov.tr/
ئەوەشخراوەتەڕوو: پێشکەشکار دەبێت فەرمانبەر یا مامۆستا بێت لە دامودەزگاکانی حکومەتی هەرێمی کوردستان.
- پێشکەشکار دەبێت بە لایەنی کەم دوو ساڵ خزمەتی هەبێت لە پاش بەدەستهێنانی دوایین بڕوانامە.
- پێشکەشکار دەبێت کۆنمرەی بەکالۆریۆسی لە 65 کەمتر نەبێت بۆ خوێندنی ماستەر و لە 70 کەمتر نەبێت بۆ خوێندنی دکتۆرا.
- ئاستی توانستی زمانی داواکراو لە بەرنامەیەک بۆ بەرنامەیەک جیاوازە، بۆیە بەر لە پێشکەشکردن، تکایە تەواوی وردەکاریەکانی ئەم بەرنامەیە بخوێننەوە کە داواکاری بۆ پێشکەش دەکەن.
- داواکار دەبێت لە هەمان بواری خۆی داواکاری بۆ بەرنامە پێشکەش بکات. (واتا بەکالۆریۆس و ماستەرەکەی لە هەمان بوار بێت بۆ خوێندنی ماستەر، ماستەر و دکتۆراکەی لە هەمان بوار بێت بۆ خوێندنی بەرنامەی دکتۆرا).
- کاندیدی سەرکەوتوو لەلایەن وەزارەتەکەمان تەنها مۆڵەتی خوێندنی پێدەدرێت واتا بە موچەی بنەڕەتی و دەرماڵە جێگیرەکان.
- کاندیدی سەرکەوتوو لەلایەن وڵاتی تورکیا پشتگیری دارایی دەکرێت، بۆ وردەکاری زیاتر تکایە سەردانی ماڵپەڕی زەمالەکە بکەن.
