لە گۆڕستانی تەل شێخە لە پارێزگای موسەننا روفاتی 155 دۆزرایەوە کە سەرجەمیان ژن و منداڵن بەشێک بوون لە هاوڵاتییانی ئەنفالکراوی هەرێمی کوردستان.
بەپێی راگەیەندراوێکی دەزگای شەهیدانی عێراق، تیمەکانمان کارەکانیان لە هەڵدانەوەی گۆڕستانی بەکۆمەڵی تەل شێخە لە پارێزگای موسەننا کۆتاییپێهێناوە و توانیویانە 155 روفات بدۆزنەوە.
ئاشکراشیکرد، روفاتەکان بۆ ئەو ژن و منداڵانەی هەرێم دەگەڕێنەوە کە لەساڵی 1988 ئەنفالکراون.
جەختیشیکردەوە، روفاتەکان رەوانەی پزیشکی دادی کراوە بەمەبەستی ئەنجامدانی پشکنین بۆیان و ئاشکراکردنی ناسنامەکانیان.
هەر لە راگەیەندراوەکەی دەزگای شەهیداندا هاتووە، لە هەمان ناوچەدا حەوت گۆڕی دیکە هەن و گومان دەکرێت زیاتریش هەبن، لە داهاتوودا ئەوانیش هەڵدەدرێنەوە.
