وەزارەتی پەروەردەی هەرێم پڕۆژەیەک بە ناونیشانی “ئی- هەڵسەنگاندن” لە وەرزی دووەمی خوێندنەوە جێبەجێدەکات.
وەزارەتی پەروەردەی هەرێمی کوردستان رایگەیاند، پڕۆژەیەکی پەروەردەیی بە ناونیشانی “ئی- هەڵسەنگاندن” لە قوتابخانەکانی هەرێم جێبەجێدەکرێت، کە بریتییە لە ئەپلیکەیشنێک و لەسەر هەردوو سیستەمی ئەندرۆید و IOS بەردەستدەبێت و لە وەرزی دووەمی خوێندنی ئەمساڵەوە لە 396 قوتابخانەی حکومی جێبەجێدەکرێت.
ئاماژە بەوەشدراوە، ئەپلیکەیشنەکە زانیاری کەسی دەربارەی خوێندکار و چەند بابەتێک لەخۆدەگرێت، بەخێوکەری خوێندکار دەتوانێت ئاگاداری زانیارییەکان بێت و بابەتەکان ببینێت.
هاوکات، ئەو بابەتانەی لە ئەپلیکەیشنەکەدا بەردەست دەبێت بریتین لە: “نمرەکان، هەڵسەنگاندن، خشتەی وانەکان، ئەرکی ماڵەوەی خوێندکار، ڕێنمایی پەروەردەیی و ئاگادارییەکان”.
